Ég hélt mig hafa séð það allt .....

Eftirfarandi birtist í Mogganum laugardaginn 23.08.08 

Ég er nýbúinn að fá grein eftir mig birta á umræðusíðum Moggans og ætlaði ekkert að fara að senda inn meira efni strax.  En þegar svona pistill kemur fyrir almenning eins og pistill Ragnars Halldórssonar föstudaginn 15. ágúst, þá spyr maður sig í 1. lagi.  Er þetta svaravert?  Í 2. lagi. Er svona gunnhyggni ástæðan fyrir fylgi íhaldsins á Íslandi?  Í 3. lagi.  Er til fólk sem í alvöru trúir því að góðærið sé sjálfstæðismönnum að þakka?  Í 4. lagi.  Eru störf Geirs H. Haarde yfir gagnrýni hafin?  Í fúlustu alvöru þá hefði ég trúað þessu upp á 7 ára krakka að tala um pabba sinn en ekki fullorðinn mann, sem þar að auki tiltlar sig ráðgjafa, að tala um stjórnmálamann.  Veit Ragnar hvað hann er að gera flokknum sínum mikinn óleik með svona barnalegri álitsgerð?  Ég mundi í alvöru skammast mín fyrir að titla mig sjálfstæðismann hér eftir.  Sko ..... skipið sem Geir siglir er gottveðurskip, samkvæmt Ragnari, sem er á leiðinni inn í vont veður og vonda veðrið er ekki Geir að kenna af því Geir getur bara smíðað gottveðurskip en góða veðrið er Geir að þakka af því Geir er svo góður pabbi og það er bannað að skamma góða pabba þegar gottveðurskipið liggur við bryggju í vonda veðrinu sem vondi kallinn bjó til.  Geir þarf bara að veifa hendinni, þá kemur gott veður, þá er hægt að láta úr höfn og setja í álfisk, virkjanafisk, og alla hina fiskana sem hjálpa okkur að halda vöruskiptajöfnuðinum í mínus sem veldur áframhaldandi gengislækkunum sem heldur uppi fallandi gengi sem heldur uppi verðbólgunni sem réttlætir háa stýrivexti sem heldur uppi tekjum bankanna.  Einfalt, skilvirkt, snjallt og engan grunar neitt.  Og það er líka bannað að skamma Jóhannes afa þó strákurinn hans sé að fljúga á flugvélinni sinni í útlandið að kaupa allan heiminn.  Hann er góður líka og pabbi hans gaf honum peninginn, hann stal honum ekkert frá köllunum sem áttu allar FL flugvélarnar með honum, það er ekki satt.  Hann Jóhannes afi græddi sko eiginlega ekkert á því að selja okkur mat og borgaði nýju búðirnar allar sjálfur og gaf fátæka fólkinu að borða líka fyrir afganginn. Og bankamennirnir eru líka góðir af því að þeir lána fólki fyrir nýja húsinu og nýja bílnum og líka nýja hjólhýsinu og meiraðsegja líka sumarbústaðnum.

Ragnar!  Skammastu þín ekki fyrir að bera svona á borð fyrir landsmenn?  Skammastu þín ekki fyrir að halda því fram að alþjóð sé svona tröllheimsk?  Geir H. Haarde silgdi þjóðarskútunni, sem Davíð, Halldór og Geir sem fjármálaráðherra voru búnir að sigla á í gegnum mörg góðviðristímabil, til hafnar áður en hvessti, svo við höldum áfram á þinni myndlíkingabraut.  Davíð og Halldór borguðu niður skuldir ríkisins í góðærinu sem segir til um fyrirhyggju þeirra en þeir gleymdu hinsvegar að setja bönd á fjársjúka menn sem nú ganga lausir í þjóðfélaginu sem virkar á sama hátt og ef þeir hefðu opnað Á.T.V.R.  með ódagsettan frímiða fyrir alkahólista.  Það sem er að er það, að til að þjóðarskútan gegni sínu hlutverki þarf að láta aftur úr höfn.  Það fiskast ekkert nema látið sé úr höfn og veiðarfærunum sleppt fyrir borð.  Og það sem skipstjórinn þarf að átta sig á er, að það er fullt af fiski í sjónum

Aðgerðir sem vantar strax til að bjarga heimilunum í landinu:

Fryst verðlag og laun til að stöðva verðbólgu á meðan fjármálakerfið er að jafna sig eftir hvassviðrið.

Að vextir lækki til jafns við nágrannalöndin.  Ef setja þarf ný lög um seðlabankann og fækka bankastjórunum til þess, þá hvað með það. 

Að verðtryggingin, sem er að sliga fyrirtækin og þó aðallega heimilin í landinu, verði aflögð .  Heimilin, sem ég hélt að væri grunnurinn í sjálfstæðishugsuninni til að frjálsa fjármálakerfið þeirra gengi upp.  Er neitandinn í hinu nýja íhaldsskipulagi orðin óþarfur?  Eða er “kreppan,, partur af prógramminu svo hægt sé að sölsa undir sig fullt af fyrirtækjum fyrir lítinn aur og rétta svo vinum og kunningjum á gjafverði?  Eru heimilin sem fara forgörðum í aðgerðunum þá bara eðlilegur fórnarkostnaður?

Að virkri samkeppni verði komið á fót í olíugeiranum, bankageiranum, milli fjármögnunarfyrirtækja, matvörugeiranum og á öllum þeim sviðum sem kemur neitandanum til góða svo hann geti haldið áfram að halda þjóðfélaginu gangandi með því að vekja neytendasamtökin af hinum langa svefni og fjármálaeftirlit verði eflt til muna.

Tilrauninni með fljótandi krónu verði hætt samstundis þar sem útséð er með að það gangi upp nema til að offóðra íslensku bankana.

Sjálfstæðishugsun þín Ragnar er trú og sterk og slík trúmennska á alla mína virðingu þó óbeit mín sé óneitanlega til staðar.

Frelsishugsjónin þín fellur um sjálfa sig í þínum eigin orðum.  Í því þjóðfélagi sem við lifum í í dag er eru hinir frjálsu fjársjúku menn sem enn eru hérna megin við rimla refsingarhússins fyrir löngu orðnir þrælar eigna sinna og við hin erum að berjast við að halda heimilinu gangandi því allt of stór hluti af tekjum okkar fer í vaxta og verðbótagreiðslur til bankanna. Þjóðarskipanin á Íslandi er fyrir löngu farin að líkjast meira frumskógarlögmálinu en siðmenntuðu mannfélagi, þar sem sá hæfasti (í að raka saman fé í eigin vasa) er mærður og forsetaembættið hefur lagst svo lágt að veita einum þeirra fálkaorðu fyrir útrásarstarfið.    

Ertu Ragnar ekki ennþá búinn að átta þig á því að neitandinn borgar allan brúsann á endanum?  Sama hvað þú nefnir og hvernig þú snýrð því, allan brúsann.  Þarf þá ekki í sjálfstæðishugsjóninni að hlúa að neitandanum númer eitt svo hann eigi fyrir brúsanum?  Og annað sem er gott að glöggva sig á.  Ísland er lítið og markaðurinn of lítill til að samkeppnishugsjónin virki.  Það hefur margsannast í verðsamráði þeirra sem ákveðnastir eru í því að ná sem stærstum bita af annars ágætum launum okkar Íslendinga.  Eitt enn sem mér sýnist þú þurfa að sjá og rata en það er hinn gullni meðalvegur. Hann er þarna þó vandrataður sé.  Veröldin er ekki bara svört og hvít, vinstri eða hægri.  Öfgarnar eru ekki góðar, í hvoruga áttina.     

Nafnlausir gagnrýnendur

Eigum við ekki að fara á einn fund hjá Guðna um efnahagsmálin áður en við tökum manninn af lífi. Það er ódýrt að gagnrýna fyrirfram undir dulnefni og jafnvel hreyta ónotum. Álíka lélegt og Bin Laden. Hann heldur fram paradísarlífi eftir sjálfsmorðssprengjuáras en þorir ekki sjálfur, raggeitin sú. Sama er með ykkur nafnlausir, þið gasprið út úr dimmum húsasundum eins og rottur úr holræsi.    

Guðni í fundaherferð

Það er framsóknarmaður í Gísla

..... þegar betur er að gáð.  Í alvöru, íhaldskurfar sem reynið að verja þvæluna og spillinguna frá ykkar fólki,  hvar væruð þið nú ef framsóknarmaður hagaði sér svona.   Þið væruð komin niður í Ráðhús, froðufellandi af bræði yfir spillingunni. 

 

 

 

Gísli Marteinn fær launahækkun

Fékk hann ekki gæsahúð?

Ótrúlegt !!!!!

Gæsahópur réðist á örn

Tillaga að þjóðarsátt.

Nú er fátt meira rætt en að þjóðin taki saman höndum við sjórnvöld, verkalýðs-hreyfinguna og samtök atvinnurekenda og segi verðbólgunni stríð á hendur líkt og gert var í stjórnartíð Steingríms Hermannssonar. Munurinn er hinsvegar sá að þá var ekki markmið hjá stjórn landsins að bankaeigendur, olíufélögin og aðrar viðlíka margstúta peningaryksugur þrifu okkur landsmenn eins og nú virðist vera. Gallinn er sá að þetta er allt okkur sjálfum að kenna. Við erum svo blind í þessu máli að engin okkar tekur eftir því hvað er í gangi. Hugsið ykkur lántakendur góðir hvað við látum mjólka okkur. Og áttum okkur á því að við verðum mjólkuð á meðan við höldum áfram að borga án þess að mótmæla okrinu. Af nákvæmlega sömu ástæðu og af hverju hundur sleikir á sér ólánið. Af því að hann getur það. Af sömu ástæðu og ofbeldismaður lemur konuna sína. Af því að hann kemst upp með það. Alveg þangað til hún segir hingað og ekki lengra og fer. Bankaeigandinn okrar á okkur af þeirri einföldu ástæðu að hann getur það. Þetta eru engin geimvísindi. Fjármálakerfið á Íslandi er ekki einhvert stjórnlaust villidýr sem enginn ræður við. Það er allaf sama viðkvæðið ef fundið er að og bent er á gallana að það ráðist ekki neitt við neitt og hin og þessi breytingin hafi hinar og þessar afleiðingar. Hugsið ykkur okurvaxtagreiðendur góðir hvað allt okkar brauðstrit væri auðveldara ef ekki væri verðtrygging á Íslandi og þ. a. l. ekki tvöfaldir og upp í fjórfaldir vextir á við nágrannalöndin okkar þar sem fólk borgar sanngjarna vexti og engin er verðtryggingin. Það segir mér enginn að okkar land og okkar fjármálakerfi sé svo einstakt í veröldinni að hér sé ekki hægt að láta hagkerfið rúlla áfram án þess að við séum ca. 3-4 húskaupendur með einn bankastarfsmann á launum miðað við vaxtagreiðslurnar sem við innum af hendi. Það er ekki skrítið þó að fjársjúkir stjórnendur þessara fyrirtækja þiggi kaupréttarsamninga upp á milljarða. Er það ekki af því að þeir geta það? Þessir menn hljóta að vera veikir. Þetta er of langt frá norminu að eins og fyllibytta er sólgin í alkóhól þá eru yfirmenn bankanna, sólgnir í peninga. Aurabyttur..... eða peningaistar. Sá frábæri penni, Þráinn Bertelsson lagði til í pistli fyrir nokkru að þessir menn fengju sömu umhyggju og hverjir aðrir rónar. Kosturinn við það er að þeir geta sjálfir borgað kostnaðinn. Og eitt er sammerkt með fólki sem er haldið þessum sjúkdómi að það heldur að allir sem ekki eyða öllum sínum tíma í að raka saman fé í eigin vasa séu heimskir og geti það ekki fyrir vikið og líka eru þau sannfærð um að allir öfundi þau af því hvað þau hafi það nú gott og að hamingjan láti þau ekki í friði.
Samstaðan.
Eina sem við okurvaxtagreiðendur þurfum að gera er að standa saman, það er ekki flóknara. Ég lofa því að við verðum mjólkuð á meðan við þegjum. En hvað ætli myndi gerast ef við einn daginn tækjum okkur saman og hættum að borga. Krafan væri “burt með verðtrygginguna og niður með vextina,,. Já ég er að tala um að við hættum að borga af lánunum þangað til að þetta væri komið í sama horf og í nágrannalöndum okkar. Skikkanlegir vextir og engin verðtrygging. Og trúið mér, þetta er hægt. MEÐ SAMSTÖÐU. Auðvitað hugsar þú núna að húsið verði boðið upp, lánið gjaldfellt og þú verðir komin niður í Laugardal í tjald eins og hver annar óbreyttur þýskur ferðamaður en þó að bankarnir á Íslandi séu feitir þá er útilokað að þeir geti fellt öll lán á einu bretti. Við erum of mikilvægur tekjustofn til þess. Svona samstaða yrði til þess að við yrðum aldrei framar blóðmjólkuð eins og gert er í dag.
Þjóðarsáttin.
Hún snýst um það að þegar búið er að fella niður verðtrygginguna og lækka vextina þá er björninn unninn. Meira þurfum við ekki. Verðtrygging og okurvextir eru tugir þúsunda hjá hverju okkar í hverjum einasta mánuði. Þannig fengjum við kaupmáttinn til baka sem búið er að hafa af okkur síðustu mánuði með veikingu krónunnar. Og við gætum afþakkað aðrar launahækkanir í bili. Við gætum farið að leggja fyrir og gera það sem okkur langar til á debetkortinu í staðinn fyrir krítarkortinu. Við verðum að taka í taumana, það er orðið einsýnt að engin gerir það fyrir okkur. En við verðum að vera sem einn maður í samstöðunni til að mark verði á okkur tekið. Öðruvísi getur þetta jú ekki kallast þjóðarsátt.
Sparifjáreigendur.
Fer allt forgörðum við að leggja niður vertðryggingu á Íslandi. Hvernig fara danskir og norskir sparifjáreigendur að? Og lífeyrissjóðirnir, eru þeir ekki með fjármagnið hingað og þangað, ekki bara inni á bók? Ef þssi fjármál ganga upp allt í kring um okkur þá geta þau gengið upp hér. Og það þarf allavega ekki að reyna að segja mér að ógöngur okkar nú séu allar ósjálfráðar og óviðráðanlegar. Nei takk. Það kemur ekki til greina að bíða í 2-3 ár eftir því að ástandið bara lagist og borga milljónir hvert okkar í bankakerfið á meðan, eins og það sé einhver lausn á málinu.

Pyntinar á pyntingar ofan .....

Bankarnir pynta íslensku þjóðina svo refsinguna eiga þeir víst skilið

„Matsfyrirtæki pynta íslenska banka"

Frjálslyndir með nýtt kosningaloforð

 

Ég hef verið, er og verð talsmaður þess að leggja niður verðtrygginguna á okkar ástkæra skeri.  Annað eins óréttlæti er ekki til á nokkru byggðu bóli.  Því finnum við mest fyrir sem erum að koma okkur þaki yfir höfuðið.  Og ef verðbólgan eykst í landinu þá er mótleikurinn að hækka vexti þannig að flestir eru að kikna undan þunganum á vaxtabyrðinni.  Sem sagt, ef að stjálfstýrðu vextirnir hækka þá hækkar miðstýringarkarlinn í Seðlabankanum handstýrðu vextina til að sjálfstýrðu vextirnir lækki aftur.  Alveg sama þó að það virki ekki þá hækkar hann bara handstýrðu vextina meira. Um svona eins og ½ % á mánuði.  Svo lækka sjálfstýrðu vextirnir einhverra hluta vegna, að því er virðist í réttu hlutfalli við minnkandi útlán bankanna en þeir draga eðlilega saman í útlánum þegar þeir leigja svo og svo mikið af íbúðum sem þeir hafa eignast vegna þess að kaupendurnir gáfust upp á vaxtabyrðinni.  Þessir fyrrverandi 100% lántakendur skulduðu meira en þeir áttu og þess vegna var ódýrast hjá þeim að ganga bara út.  Ekki hjálpaði hækkandi húsnæðisverð þessu fólki við afborganirnar eins og mannvitsbrekkan dharma vill meina að gangi upp.  Ekki varð þetta fólk vart við eignamyndun.  Svo ef að verðbólgan hjaðnar af fyrrgreindum ástæðum ber miðstýringarkarlinn sér sjálfsagt á brjóst og hrósar sér fyrir snilldar stjórnun á eyðslu og bruðli landans.  Það heitir nefnilega ekki miðstýring nema hún komi frá ríkisstjórninni, ef seðlabankastjórinn reynir að hafa áhrif á athafnir almennings heitir það, tja ..... ætli það heiti ekki hagstjórn.  Mikið værum við illa stödd ef við hefðum ekki svona snillinga í brúnni. 

  En nú er væntanlega breyting framundan á þessu og verðtryggingin heyrir sennilega sögunni til ef marka má heilsíðu auglýsingu Frjálslynda flokksins.  Ekki trúi ég öðru en að kjósendur fylkist um þetta fólk sem lofar mestu byltingu í hagstjórn Íslands í manna minnum, stórum meirhluta þjóðarinnar til hagsbóta.  En frekari útlistingar er þörf á framkvæmdinni til að í það minnsta ég kaupi kosningaloforðið.  Það eru milljarðar í svokölluðum krónubréfum í umferð.  Ef ég skil þetta rétt þá eru ríkir menn og stjórnendur alls kyns erlendra sjóða sem kaupa krónubréf vegna þess að þau eru náttúrulega verðtryggð eins og allt annað á þessu skeri, nema launin og þegar að hér er 5-8% verðbólga þá eru það fínir vextir fyrir þessa erlendu kaupendur.  Ef við mundum aflétta verðtryggingunni með einu pennastriki kæmu þessi krónubréf væntanlega til innlausnar öll sama daginn. Hvernig á til dæmis að leysa það?  Frægt var þegar að norski olíusjóðurinn innleysti krónubréf einn daginn fyrir svo háar fjárhæðir að krónan hríðféll.  Og það sauð á Halldóri.  Auðvitað þurfti hann að lenda í þessu ofan á allt annað, sá annars ágæti maður. 

  En ég, og sjálfsagt fleiri, viljum fá að vita hvernig á að framkvæma niðurfellinguna á verðtryggingunni.  Það er ekki spurning að það er hægt, og allt sem þarf er vilji.  Og þó.  Sennilega þarf að kjósa verndara þess kerfis sem við skrimtum nú við, út af þingi eða að minnsta kosti úr stjórnarráðinu.  Verndara verðtryggingarinnar.   Verndara bankanna.  Miðstýringuna í Seðlabankanum.  Burtu með það allt.

Einelti

  Ömurlegt orð.  Orð sem þýðir það að margir ráðast á einn og reyna að brjóta hann niður og undir sig með öllum tiltækum ráðum.  Ég þekki málið lítillega af eigin reynslu eins og margir.  Ekki það að ég ætli í þessum pistli að fara að rekja raunir mínar eða að gera upp við þá sem mér finnst hafa gert á minn hlut í gegnum tíðina. Ég bara tel mig þekkja einelti þegar ég sé það.  Gerendur í einelti eru oftast kvikindi sem lítið hafa til brunns að bera og upphefja sjálfan sig með því að lítillækka þá sem viðkvæmastir eru, eða minnst hafa sjálfstraustið.   En nú erum við Íslendingar að uppgötva nýja tegund af einelti, í það minnsta hef ég aldrei séð hana áður.  Hún snýst um að vera með tvær skepnur fyrir framan sig, aðra stóra og volduga sem kannski getur komið sér vel síðar að styggja ekki mikið, hina lítla og væskilslega og nokkuð öruggt að kvikindið þarf ekki á henni að halda í nánustu framtíð. Og kvikindið þarf að sparka í aðra hvora skepnuna.  Og þegar kjarkurinn er ekki meiri en gerist og gengur hjá gerendum í eineltismálum yfirleitt, er ekki nema eitt að gera.  Sparka í litla dýrið.   Einhvern veginn svona sé ég stjórnmála / kosninga-umræðuna fyrir mér þessi misserin.    Kjarkurinn er ekki meiri en þetta hjá stjórnarandstöðunni.  Ekki veit ég nákvæmlega hugsunina á bak við þetta, hún getur verið á svo marga vegu.  Er stjórnarandstaðan þeirrar skoðunar að ekki sé hægt að ná atkvæðunum frá íhaldinu?  Þeir sem ætla að kjósa Sjálfstæðisflokkinn sem ég þekki eru annaðhvort blindir íhaldskurfar sem mundu kjósa flokkinn þó hundar væru í efstu sætum í öllum kjördæmum, þeim atkvæðum náum við aldrei,  eða unggæðingar sem ekkert vit hafa á pólitík, þekkja ekki stefnuskrá flokkanna, og kjósa Sjálfstæðisflokkinn af því að það þykir fínt og gerir menn “ríka,,.  Allt sem þá skiptir máli er jatan sem þeir sjálfir eiga að éta af.  Í því merkilega ríki Tíbet, eru menn metnir að verðleikum eftir því hversu vel þeir hugsuðu um aðra en sjálfa sig.  Hversu vel þeir skiptu af gnægtaborðinu. Það eru menn sem náð hafa að þroska hugsun sína og hlutu því ekki andlegt gjaldþrot, blindaðir af græðgi.  En það er hægt að opna augu þessara manna og því má ekki hætta og gleyma sér við að ná bara í atkvæðin sem auðveldari eru.    En það sem svíður mest í þessu máli er fordæmið, fordæmisgildið.  Á meðan eytt er stórfé í að kenna börnunum að umgangast hvort annað af virðingu og gæta þess að einelti sé haldið niðri eins og hægt er í skólum og félagsstarfi ungmenna, er þetta fordæmið hjá fólkinu í þessu landi sem mest er í sviðsljósinu.  Þetta er álíka vænlegt til árangurs og að friða rjúpuna og friða líka refinn.

Kjósa þeir sem lítið eða ekkert vit hafa á stjórnmálum, Sjálfstæðisflokkinn

Ég hef velt þessari spurningu töluvert fyrir mér og held að það sé nokkuð til í þessu.  En íhaldsmenn meiga vera stoltir af þessu því að það hljóta að liggja gríðar mörg atkvæði þar á bak við.  Þetta er herkænska.Einhvern veginn hefur íhaldinu tekist að koma því inn hjá fólki að það sé fínt að kjósa flokkinn og allir sem kjósa íhaldið eru, virðist vera, stoltir af því og básúna það frekar en hitt.  Grunnstefnan er jú frjálshyggja, peningastefna, sjálfsbjargarviðleitni, jafnvel er frumskógarlögmálið í hávegum haft.  Þeir hæfustu hafa það best (peningalega) og skal púkkað undir þá eins og hægt er, hinir geta átt sig og skulu mergsognir til frekari upphafningar þeim sem betra hafa það.  Þannig að þeir rétt skrimti.  Hafi ekki mátt til að mótmæla. Peningastefna.  Það þykir jú fínt að berast mikið á og þeir sem hugsa um eitthvað annað en að komast í álnir eru álitnir vöntunarmenn.  Sérvitringar sem kunna ekki að græða.  Í þjóðfélagi dagsins í dag er maðurinn dæmdur eftir því hvað hann er ríkur.  Eða hvað honum tekst að láta líta út fyrir að hann sé ríkur.  Mjög margir eru held ég þrælar eigna sinna.  Ekki öfunda ég þetta blessað fólk þó það líti nú sennilega þannig út í þessum skrifum mínum.  Ég hef ekki séð að aurarnir færi þessu fólki neina hamingju, eini munurinn er sá að þetta fólk getur ferðast út um allan heim að leita að henni.  Sem getur jú verið fróðlegt.  Aðeins lítið brot af þeim mönnum sem ég hef kynnst í gegnum tíðina höndla þetta, að komast í álnir, og eru ekki skemmdir eftir.  Græðgin nær taki á flestu þessu fólki og ekki er hún af hinu góða.  Og þau sem langar að fara þessa leið í lífinu kjósa sjálfsagt íhaldið í þeirri trú að þannig skapist rétta umhverfið   Sjálfstæðisflokkurinn.  Bara nafnið þykir fínt.  Það er í tísku að vera sjálfstæður, að vinna sjálfstætt  er hæstmóðins.  Kannski ekki eins fínt og að vera frílens en næst þar á eftir.  Af hverju hefur engum dottið í hug nefna flokkinn sinn frílensflokkinn.  Hvað var Ingibjörg Sólrún að hugsa.Ímyndin.  Hún virðist vera góð hjá flokknum og hafa myndir af þekktu fólki í stuðningsyfirlýsingu við flokkinn  átt stæðstan þátt í því að mínu mati.  Aðrir flokkar hafa reynt svipað en ekki í líkt eins miklum mæli. En svo eru auðvitað þeir sem mundu kjósa íhaldið þó að hundar og kettir vermdu efstu sætin í öllum kjördæmum, og þannig er það líka með aðra flokka, sér í lagi eldri flokkana.Síðast  ætla ég að minnast á þá sem eru alvöru íhaldsmenn og trúa á frumskógarlögmálið.  Grunnurinn er fyrirtækin.  Sterk og góð fyritæki er undirstaða samfélagsins eins og það er uppbyggt í dag og mættu fleiri flokkar taka það sér til fyrirmyndar að hlúa vel að þeim.  Ekki vinna gegn fyrirtækjunum og gera þeim erfitt fyrir, setja þeim hömlur þannig að þau fái ekki að blómstra.  En svo þar sem að einokun og fákeppni er til staðar, eins og er í flestum tilfellum hér á Íslandi, verður græðgin allsráðandi og þá vinnur sjálfvirka grunnundirstöðuuppbyggingin ekki rétt.  Þar segi ég að íhaldið vilji ekki, prinsippanna vegna, taka í taumana.  En ég get ekki að því gert að ólykt finnst mér vera af lokuðu bókhaldi sjálfstæðisflokksins.      Ég hef spurt ungan mann, á að giska 25 ára, sem básúnaði mikið um sjálfstæðishyggju sína og var harður íhaldsmaður, hvort sem á dagskránni var landsmála eða sveitastjórnapólitík, um stefnu Sjálfstæðisflokksins.  Ég fékk engin svör en hann kvaðst sennilega þurfa að kynna sér málið nánar.                   

Matvælaverð,vextir, verðbætur og samhengið þar á milli.

     Við getum stofnað endalaust nefndir, hef ég á tilfinningunni, til að finna út af hverju matur er svona dýr á Íslandi og alltaf komist að sömu niðurstöðu og hún er  “ráðumst á bændur og gerum frjálsan innflutning á landbúnaðarafurðum til landsins,,      Umræðan um málefnið er af hinu góða og verður að vera á lofti svo eitthvað gerist í þessum málum, en einhæfnin og hugmyndaleysið í umræðunni um þetta mál allt, er hreint með ólíkindum.     Gott og vel, þróunin hjá bændum á okkar landi er undafarin ár á þá leið að búum fækkar og þau stækka sem hlýtur á endanum að leiða til lækkandi verðs vegna aukinnar hagkvæmni í þessum stærri rekstrareiningum. Svo dreifa fóðurfyrirtækin jafn miklu fóðri á færri staði og afurðastöðvarnar safna mjólkinni , kjötinu og öðrum afurðum í jafn miklu magni á færri stöðum.    En hefur engum fréttamanninum dottið í hug að bera saman verð á fóðurbæti til bænda?  Fróðlegt væri ef sá kostnaðarliður sem og túnáburður, en þetta eru einhverjir hæstu útgjaldaliðir búanna, væri borin saman við hin norðurlöndin en ekki bara hlaupin ein ferðin enn út í búð og innkaupakarfan fyllt.   Nú um síðustu áramót tók steininn alveg úr þegar einn af öflugustu féhirðum íslandssögunnar var sæmdur íslensku fálkaorðunni fyrir það að fara með svo og svo mikið af peningunum sem hann var búinn að raka saman á ökrum almennings til útlanda og kaupa banka fyrir þá. Þannig og aðeins þannig gat maðurinn sannað að eitthvað væri í hann spunnið því að á hinum norðurlöndunum geta þeir bara rukkað 3-4% vexti OG ENGA VERÐTRYGGINGU.  Maðurinn á orðuna skilið og enginn annar, fyrir þetta stórkostlega afrek.  Svo flokkast þetta líka undir það sem kallað er útrás og er hæstmóðins í dag auk þess að vera þjóðhagslega hagkvæmt.  Ég held að Ólafur forseti hafi veitt honum orðuna fyrir stórkostlega leikni sem strengjabrúðustjórnandi ársins.  Jón Sigurðsson var, vægt til orða tekið, sannfærandi þegar hann sagði okkur í sumar að nú væri ekki rétti tíminn til að leggja verðtrygginguna  niður og mikilli gleði og ljóma fylltist hjarta mitt þegar ég heyrði Geir Haarde segja okkur hvað bankarnir greiddu mikið í skatta á síðasta ári.  Hvar værum við bara stödd án þessara stórkostlegu banka okkar og stórflinkra stjórnenda þeirra.  En áfram með matvælaverðið, meira um bankana og strengjabrúðurnar þeirra síðar.    Samhengi er þarna á milli  þ.e.a.s. milli bankanna og matvælaverðsins og meira en samhengi.  Kæri fréttamaður, ertu fánlegur til að spyrja næst þegar þú hefur tækifæri til, rétta aðila, og ekki láta þá komast upp með að svara ekki, um samhengi milli hárra vaxta á Íslandi og hás matvælaverðs.  Tökum dæmi.  Kúabú, svínabú, kjúklingabú eða fjárbú sem fylgja áðurnefndri þróun sem felst í stækkun og fækkun búa.

1. Búið skuldar 100 milljónir eftir dýra uppbyggingu húsa og kvótakaup og bankinn tekur 15% vexti á ári, það  eru 15 milljónir á ári bara í vexti sem fara að sjálfsögðu beint út í matvælaverðið.
2. Sláturhúsið skuldar líka 100 milljónir vegna þess að síauknar kröfur eru gerðar til hreinlætis og vandaðrar meðhöndlunar matvæla, allt verður að fylgja nýjustu  evrópustöðlum og öðrum álíka tískustraumum þó bragðið sé nú svipað og áður en það hét villilamb. Sláturhúsið borgar líka 15 milljónir í vexti og verðbætur.  Og þar er verið að meðhöndla sama kjötbitann og á búinu í lið 1.
3. Við skulum fylgja þessum sama kjötbita úr sláturhúsinu í kjötvinnsluna þar sem hann er  hanteraður í alls kyns krásir og álegg og allt hvað heitið hefur. En kjötvinnslan skuldar líka 100 milljónir og borgar þar af leiðandi 15 milljónir í vexti á ári 
4.  Svo skulum við fara á þann stað sem við þekkjum hvað best af þessari upptalningu.  Við skulum fara út í búð en þessi verslun berst í bökkum eftir verðstríðið sem geysaði hér á síðasta ári, skuldar 100 milljónir og verður að borga 15% í vexti á ársgrundvelli. Kaupmaðurinn hefur enga vasa til að sækja þetta fé í nema hjá sauðheimskum almúganum sem hann kallar í daglegu tali væntanlega viðskiptavini.

Hvað skyldi þetta kosta okkur þegar upp er staðið?  Er ekki þarna sem hundurinn liggur grafinn?  En af hverju erum við svona hrædd við að tala um þetta?  Eða hefur bara engum dottið þetta í hug?  Mér datt þetta ekki í hug, það var Guðmundur í næsta húsi sem spurði Kjartan Ólafsson þingmann okkar sunnlendinga að þessu.  Svarið ætla ég ekki að hafa eftir.          Aftur að bönkunum og verðtryggingunni.  Hvenær er rétti tíminn til að leggja niður verðtrygginguna.  Kannski þegar verðbólgan lækkar eins og gerðist vegna þjóðarátaks á vormánuðum 2006.  Er þá rétti tíminn?  Af hverju?Lánið sem ég tók í október 2004 hefur hlaðið á sig 2,4 milljónum í formi verðbóta.  Er verið að nýta tímann svo að höfuðstóll lánanna verði sem hæstur þegar verðtryggingin er tekin af eða er bara verið að eyða umræðunni eina ferðina enn?  Er kippt í strenginn sem lyftir hökunni svo munnurinn lokist?    Tökum eitt dæmi.  Hvaða réttlæti er í því að ef olíuverðsamráðsríkin minnka framleiðslu til að hækka verð, þá hækkar vísitalan á Íslandi og afborgunin á húsunum okkar sem og höfuðstóllinn hækkar.  Fyrirgefið mér en ég sé ekki og skil ekki samhengið.  En bíddu við, hver fær krónurnar sem ég borga í viðbót í formi hærri verðtryggingar?  Bankarnir.  En hvar komu þeir inn í þessa mynd?  Af hverju?  Hvers vegna?  Hvað kemur bönkunum þetta við?  Ekki er þetta til að hjálpa mér að skilja þessa ótrúlegu samhengisleysu.     Einsýnt er að allt fjármálakerfið á Íslandi er uppbyggt á þann veg að hagur þess er há verðbólga. Verðbætur eru ekkert annað en vextir, ekkert annað.  Bankarnir borga aðeins brot af verðbótunum aftur til baka til sinna viðskiptavina.  Hvernig væri hagkerfið á Íslandi í dag ef það væri hagur þess að hér væri engin verðbólga.  Mundu þá ekki allir bankar, allar lánastofnanir svo og ríkisstjórnin vinna að því markmiði.  Af hverju er þá ekki vísitalan lögð niður núna svo við getum nýtt þessi öfl, sem eru svo vel stæð, í hagkerfinu með í þetta verkefni.  Ég get ekki vorkennt bönkunum þó þeir töpuðu nokkur hundruð milljónum á þessu, ég hef á tilfinningunni að við eigum það inni hjá þeim og vel það.    Getur verið að samhengi sé á milli sölu bankanna, hárra vaxta og lokaðs bókhalds stjórnmálaflokkanna.  Maður spyr sig.  Er íslenska stjórnmálakerfið kannski bara þrælspillt og tekst bara svona vel að fela það.   Ég setti mér ármótaheit, ef ekkert fer að breytast í þessum málum ætla ég að safna liði.  Ég ætla að stofna landssamtök vaxtagreiðenda.  Það verður ekkert félagsgjald.  Takmark samtakanna númer eitt verður að knýja bankana til að leggja niður uppgreiðslugjöld svo einhver samkeppni verði til í þessum geira, svo förum við að tala um vexti og verðbætur.  Þetta er ekki hótun, þetta er loforð.